Нана-латта

• Сийналлехь анайист йайна,
• ХӀаваэхь аьрзуш а го:
• Хаза ду, аьхна ду, тайна,
• ХӀай, Делан жил-1алам хьо!

• Кху хазчу Ӏаламе хьоьжуш,
• Дахаран ойланаш йо:
• Исбаьхьа хазалла хьоьшуш,
• Вай цуьнан пусар ца до.

• Зен-зулам хетар дац кӀезга,
• Харцабеш ойланийн пен,
• Бехдича шовданан куьзга,
• Бохийча хьозанан бен. 

• Кхокханийн эшарш а хадош,
• Кхераме дегийча герз.
• Иккхича, стигалш а Ӏадош,
• Дахаран мукъамийн мерз.

• Герзел а зулам до матто,
• Бакъабеш дикаллин стом.
• Вай Ӏабац, ца йича гатто,
• Цхьаьнга ца хьебича тӀом.

• Молханан дахкарлахь хьун йу,
• ЦӀе йаьлла кхехкаш бу тӀом.
• Адмаша къуьйсуш дерг хӀун ду?
• Шун Нана-Латта дай со-м!

                  Сан деган къилба

• Ирс лоьхуш, дӀаэхарх мел гена шу,
• Ма дицде неӀсагӀа хьомсарчу ненан.
• Нана шен берашка сатуьйсуш йу,
• ДоӀанехь вай доьхуш массо а хенахь!

• Нохчийчоь — зазалахь бӀаьсте,
• Къизалло со хьох ца къастий.
• Нохчийчоь, хьийзаварх дарцо,
• Хьо ду сан синтеман орца!

• Дош ала дай хилар ду доккха ирс,
• Дахийша ийманехь, вовшийн деш реза.
• Мел генахь коьрта т1е йиллича йис,
• Вай хьоме лаьмнашка цӀадерза деза.

• Нохчийчоь — сийлаллин бӀаьсте,
• Харцоно, со хьох ца къастий.
• Нохчийчоь, хьийзаварх дарцо,
• Нохчийчоь, хьо ду сан орца!

• Исбаьхьчу хазалло айъина са,
• Лаьтта со, Даймахке бӀаьрг бетташ тийна:
• Кхузахь ду сан дедай хьистина ц1а,
• Кхузахь сан бераллин ага техкийна.

• Нохчийчоь — къоналлин бӀаьсте,
• Мацалло со хьох ца къастий.
• Нохчийчоь, хьийзаварх дарцо,
• Нохчийчоь, хьо ду сан орца!